KIAMA WALIOFICHA MAFUTA YA KUPIKIA

Serikali imetangaza msako mkali dhidi ya wafanyabiashara waklioficha shehena  ya mafuta ya kupikia na kusababisha  upungufu wa bidhaa hiyo nchini.

Utakuwa mask wa pili wa bidhaa za vyakula tango mwaka 2016 baada ya kampeni ya sukari.

Imesema kamwe haitakubali wananchi kuchezewa na wafanyabiashara wasio waaminifu, hivyo imetoa siku tatu kwao kuhakikisha wanasambaza mafuta haraka.

Ili kuhakikisha agizo lake hilo linatekelezwa kikamilifu, imesema kuanzia Jumapili msako mkali utafanyika kwenye viwanda na maghala yote kuwabaini walioficha bidhaa hiyo muhimu kwa wananchi.

Kwa siku tatu mfululizo, Bunge limekuwa kwenye mjadala mzito kuhusu upungufu wa mafuta ya kupikia huku baadhi ya wabunge wakikiomba Kiti cha Spika kuitaka serikali kutoa kauli bungeni kuhusu upungufu huo.

Na kutokana na mjadala huo mzito, juzi asubuhi Spika wa Bunge, Job Ndugai, aliiagiza serikali kuhakikisha inatoa majibu ya uhakika bungeni jioni kuhusu uhaba wa mafuta ya kupikia uliosababisha bidhaa hiyo kupanda bei mara dufu.

Hata hivyo, serikali ilishindwa kutekeleza agizo hilo la Spika kutokana na kile kilichoelezwa na Waziri wa Nchi, Ofisi ya Waziri Mkuu, Sera, Bunge, Ajira, Vijana, Kazi na Watu Wenye Ulemavu, Jenista Mhagama kwamba walihitaji kuwa na majibu kamilifu hivyo akaomba majibu ya serikali yatolewe Jumatano (jana) saa 11 jioni.

Akitoa kauli hiyo ya serikali jana bungeni mjini hapa, Waziri Mkuu Kassim Majaliwa, alisema kwa takwimu zilizopo, nchi haikupaswa kukabiliwa na upungufu wa mafuta ya kupikia.

Alisema wastani wa lita za mafuta ghafi ya kupikia tani 30,000 zinaingizwa nchini na wafanyabiashara huku matumizi kwa mwezi yakiwa wastani wa tani 28,900.

"Mafuta yaliyoagizwa kuanzia Januari hadi Machi mwaka huu yalikuwa na uwezo wa kutosheleza mwezi Aprili na mafuta ya Mei ambayo yameendelea kupokewa kusingekuwa na upungufu wa mafuta," Waziri Mkuu alisema na kuongeza:

"Jambo hili hatuwezi kukubaliana nalo tukaliacha lilivyo kwa sababu upo mpango unaoonekana wa kutaka kuwayumbisha watanzania katika kipindi hiki ambacho tunajua waislamu wanakaribia kufunga.

"Natoa maelekezo kwa wafanyabiashara wanaohusika na mafuta pamoja na sukari, tunatoa siku tatu kuanzia kesho (leo) Alhamisi, Ijumaa na Jumamosi, mafuta yote yaliyopo yaondolewe yaendelee kupatikana nchini, ili Watanzania wasihangaike na wasilazimike kununua kwa bei ya juu."

Kiongozi huyo wa serikali alisema kuanzia Jumapili, serikali italazimika kuingia viwandani na kwenye maghala kuhakiki kama mafuta yapo au hayapo.

Majaliwa alieleza hatua hiyo inafanyika kwa sababu shida wanayokabiliana nayo wananchi, hivyo serikali haiwezi kuvumilia.

"Jambo hili halipo kwa bahati mbaya, mafuta yapo wananchi wanaweza kununua tena kwa bei ileile. Kwa hiyo, nataka wabunge mtambue mafuta tunayo na taratibu za kusambaza zinafanyika kuhakikisha yanapatikana kwenye maeneo yote kwa bei ileile," alisema.

Awali akiwasilisha taarifa yake bungeni jana kama alivyotakiwa na Spika, Waziri wa Viwanda, Biashara na Uwekezaji, Charles Mwijage, alielezea uhalisia wa sakata hilo la uhaba wa mafuta kama aliyoagizwa na kiongozi huyo wa Bunge.

Mwijage alisema vyanzo vinavyotumika kuzalishia mafuta nchini vinatosheleza mahitaji kwa asilimia 30, hivyo asilimia 70 huagizwa kutoka nje ya nchi.

Alibainisha kuwa katika miezi mitatu ya mwanzoni mwa mwaka huu, yaani kuanzia Januari, wastani wa mafuta yaliyoagizwa ni tani 30,210.71 na jumla ya akiba ya mafuta yaliyopo nchini ni wastani wa tani 68, 902.

Alizitaja kampuni zilizoagiza mafuta hayo kuwa ni East Coast, BIDCO,  Mulza Oil na G and B na Mikoani Trades na mafuta yaliyopo kwenye meli ambayo yanasubiriwa kushushwa bandarini ni wastani wa tani 40,000.

Alisema mafuta yanaposhushwa bandarini, Shirika la Viwango (TBS) huchukua sampuli kuzipima kisha matokeo hayo huwasilishwa kwa Mamlaka ya Mapato (TRA).

Waziri huyo alisema kuwa kwa mujibu wa taratibu, TRA huwataka waagizaji wa mafuta kuwasilisha nyaraka mbalimbali kutoka kwenye mamlaka zinazotambulika kwenye nchi ambazo mafuta yametoka.

Alisema kuwa baadhi ya nyaraka hizo ni vielelezo vinavyoonyesha malipo ya mizigo iliyoingizwa.

Mwijage alisema kumebainika utata wa viwango kwenye mafuta yaliyopo bandarini tani 68,000.

"Waagizaji pamoja na kutakiwa kuwasilisha nyaraka muhimu zinazohitajika hawakufanya hivyo. Pamoja na wastani wa uagizaji mafuta mwaka huu kuonyesha kuwa juu ya wastani wa mwaka jana, inashangaza kuona kuna uhaba wa mafuta. Ukweli ni kwamba ilitegemewa mafuta yaliyopo nchini yangeweza kutosheleza nchi," alisema na kuongeza: 

"Naomba Bunge lako lifahamu kuwa kiwango cha mafuta ghafi yalipo nchini kinatosheleza. Kufuatia kiasi cha mafuta ghafi yaliyaogizwa kwa miezi mitatu, tunapaswa kuwa na mafuta yenye kutosheleza kwa sasa.

"Serikali itahakikisha wananchi wanapata mafuta kama ilivyokuwa kawaida na katika kipindi cha mwezi Mtukufu wa Ramadhani, serikali haitakubali kuchonganishwa na wananchi kwa watu wachache kusababisha upungufu wa mafuta na bidhaa nyingine."

Baada ya maelezo hayo ya Mwijage, ndipo Waziri Mkuu aliposimama na kutoa kauli bungeni kuhusu msako dhidi ya wafanyabiashara walioficha mafuta ya kupikia.

 NIPASHE